Veiðigjald og skattaspor HB Granda 2017

Verðmætasköpun af rekstri HB Granda á árinu 2017 nam 25.147 milljónum króna sem ráðstafað var til samfélagsins með margvíslegum hætti, svo sem með launagreiðslum til starfsfólks, kaupum á aðföngum frá birgjum, arðgreiðslum til hluthafa, greiðslu opinberra gjalda o.s.frv.

Skattbyrði félagsins vegna ársins 2017 nam 2.625 milljónum króna en þar af nam veiðigjald 756 milljónum króna.

Til viðbótar við ofangreinda skatta, sem gjaldfærðir voru hjá félaginum, innheimti það og stóð skil á sköttum og gjöldum að upphæð 2.870 milljónum króna en þau tengjast rekstrinum og þeim verðmætum sem hann skilar með beinum hætti.

Skattaspor félagsins nam því samtals 5.495 milljónum króna á árinu 2017.

Félagið er stolt af framlagi sínu til samfélagsins og þeirri félagslegu uppbyggingu sem þar á sér stað.

Innkaupastefna og birgjamat

Það er stefna HB Granda að styðja við þá starfsemi á Vopnafirði, á Akranesi og í Reykjavík sem tengist á einhvern hátt félaginu eða er mikilvæg fyrir samfélögin á viðkomandi svæðum. Þrátt fyrir það gerir HB Grandi þær kröfur að lykilatriðin í vali félagsins á birgjum og þjónustuaðilum séu gæði, þjónusta og samkeppnishæft verð. Þegar þessir þrír þættir fara saman leiða þeir félagið að hagkvæmasta verðinu hverju sinni með tilliti til hámarksgæða og bættrar þjónustu.

Birgjar í nærsamfélagi

HB Grandi skilgreinir Ísland sem nærsamfélag sitt. Hlutfall innlendra birgja í keyptum rekstrarkostnaði, vöru og þjónustu, er 96% af heildarinnkaupum félagsins fyrir árið 2017, án endurnýjunar skipaflota. Margt kemur til en HB Grandi hefur í flestöllum tilfellum gert kröfur um að birgjar haldi vörulager fyrir starfsemi félagsins og að afgreiðslan sé í samræmi við notkun hverju sinni. Öllum kostnaði og rýrnun við birgðahald er því haldið í lágmarki. Einnig gerir staðsetning fyrirtækisins á landsbyggðinni, á Akranesi og á Vopnafirði, það að verkum að HB Granda rennur blóðið til skyldunnar og nýtir sér þá þjónustu sem er á viðkomandi stöðum. Félagið gerir sér grein fyrir því að stuðningur við nærsamfélagið skiptir félagið og starfsfólk þess miklu máli.

HB Grandi er í innleiðingarfasa með innkaup á netinu í gegnum kerfi sem heitir Timian. Þar eru birgjar valdir út frá gæðum á þeim vörum sem þeir bjóða og þeirri þjónustu sem HB Grandi gerir kröfur um. Síðan ræður samkeppnishæfi verðs því hvort félagið kaupir af einum birgja frekar en öðrum.

Umhverfisáhrif birgja

Liður í verkefninu „Hrein virðiskeðja sjávarútvegs“ er söfnun upplýsinga um umhverfisáhrif þeirrar þjónustu og varnings sem HB Grandi verslar af sínum birgjum. Slík upplýsingasöfnun gefur HB Granda færi á því að byggja upp þekkingu á losun frá öllum rekstrareiningum félagsins og allri virðiskeðju þess. Þannig getur félagið tekið upplýsta ákvörðun um að eiga viðskipti við þá birgja sem valda minnstum umhverfisáhrifum og þar með dregið úr neikvæðum umhverfisáhrifum af starfsemi félagsins með markvissum hætti.

Á árinu 2016 fór HB Grandi að setja inn ákvæði í stærstu innkaupasamninga félagsins varðandi umhverfismál. Ákvæðið er svohljóðandi:

„HB Grandi er aðili að loftslagsyfirlýsingu Festu, miðstöðvar um samfélagsábyrgð, og Reykjavíkurborgar sem undirrituð var af 104 fyrirtækjum í Höfða árið 2015. Með þeirri yfirlýsingu hefur félagið skuldbundið sig til að draga úr losun gróðurhúsalofttegunda á næstu árum. Hluti af því er m.a. að kortleggja áhrif þjónustuaðila og starfsemi þeirra á rekstur HB Granda sem mun endurspeglast í umhverfisuppgjöri sem félagið sendir frá sér árlega. Til að styðja við þessi markmið munu þjónustuaðilar skuldbinda sig, í byrjun hvers árs eða með reglubundnum hætti, til að upplýsa um umhverfisáhrif þeirra á rekstur HB Granda fyrir líðandi ár.“

Í dag geyma ellefu samningar við stærstu birgjana þetta ákvæði. Í hlutfalli við árlegan rekstrarkostnað félagsins eru þetta um 21% af öllum innkaupum.

Stjórnarhættir

Stjórn og forsvarsmenn HB Granda leggja ríka áherslu á að viðhafa góða stjórnarhætti svo að tryggt sé að starf stjórnarinnar sem og starfsemi félagsins í heild uppfylli þau viðmið sem gilda um góða viðskiptahætti. Félagið er skráð á aðalmarkaði NASDAQ-kauphallarinnar á Norðurlöndunum og fylgir þeim samskiptareglum sem þar gilda. Aðalfundur er haldinn árlega og fjárfestafundir haldnir fjórum sinnum yfir árið.

Hér fyrir neðan má nálgast stjórnarháttayfirlýsingu og starfsreglur stjórnar þar sem gerð er grein fyrir samsetningu stjórnar, aðgreiningu valds og ákvarðanatöku.

Helstu ákvarðanir stjórnar á árinu 2017 voru:

• Flutningur botnfiskvinnslunnar á Akranesi í Norðurgarð og þar með lokun hennar á Akranesi
• Fjárfesting í nýjum frystitogara
• Sala Þerneyjar
• Sala Bárugötu 8-10 Akranesi (botnfiskvinnsluhús)
• Kollagen - eignast 22,3% hlut með greiðslu nýs hlutafjár
• Háteigur - kaup á þriðjungshlut með nýju hlutafé
• Sala Ottó N. Þorláksson

Undirnefndir stjórnar voru skipaðar af stjórn á stjórnarfundi 5 maí 2017.

Rekstraruppgjör